तिमी नआइकनै
तिमीलाई नभनिकनै
रित्तो कोठा जस्तो मेरो मनमा
तिम्रा यादहरू बसाई सर्न आएका छन्।

बाँसुरी र सारंगीको धुनले
बादलमा ढाकिएको जूनले
चरीहरूको चिरबिर
र झ्याउँकिरीको किरबिरले
डोहोर्याउँदै ल्याएका ती फरार यादहरू
फेरी आफ्नै घर फर्किएछन्।

जसरी बगैँचाको फूल
मालीको नभएर डालीको हो
त्यसैगरी तिम्रा यादहरू पनि तिम्रै हुन्।
अत्यास लाग्दा भनिदिनू
आएकै बाटो पठाइदिनेछु पाहुना यादहरू
जसले कतै बाटैमा छुटेको
“तिमी” बोकेर आउनेछ, तिमीमा।

Read More From Suman Bhattarai:

-कथा खोज्न हिडेको, व्यथा टिपेर फर्किए | Suman Bhattarai