सम्भावनाको ढोकाबाट
अलिकती चिहाएर हेर्दा
देखिन्छन् –
– उल्लासका असंख्य खजानाहरु
– मानवताका निर्भय लामहरु
– जीवनका मागपत्रहरु

त्यही ढोकाबाट
अलिबढी चिहाएर हेर्दा
देखिन्छन् –
– विश्वासका सुन्दर बागहरु
– समृद्धिका सुनौला हिमालहरु
– उज्यालोका सहस्र नदिहरु

यतिबेला लाग्छ –
लामो दुश्चक्रबाट जागृत हामी
लोलाइरहेका छौं अझै
सम्भावनाकाे ढोका अगाडी
लाग्छ –
सम्भावनाकाे ढोका उघार्न
काँपीरहेका छन् हाम्रा हातहरु

जस्तो कि
कुनै कलिलो कन्चटमा
राइफल दाग्दा पनि
काँप्दैन आतंकीको मुटु
तर
काँप्छ हात –
ति स्वास्थ्य स्वयंसेविकाको
जो
पिलाउँदैछिन् भिटामिन क्याप्सुल
लाग्छ –
ठिक त्यसरीनै काँपिरहेका छन् हाम्रा हातहरु

भन्नुस् न,
अझै कति कँपाइरहने – हाम्रा हातहरु ?
अझै कति पर्खने हो – साइत ?
सम्भावनाको ढोका उघार्नका लागि ।

-Saroj Uddipt

Read More Nepali Poem at Offline Thinker:

क बाट कलम ! जनक कार्की | Offline Thinker