By लण्डन टावरब्रिजबाट हेर्दा
कुशल मस्तिकको सिर्जना
अलौकिक कला र श्रृंगारहरु
रहरै रहर हुनेहरुको शहर
पैसा बगाउनेहरुको लण्डन शहर
सांसारिक सुख र खुशी पोखिन्छ सबै प्रहर
सुन्दरी, अझ झनै सुन्दरीहरुको जमघट्
प्रेमिल सपनाहरु भेटिने क्यानडा नहर
सानो देशको अझ सानो मानिस
गरिब देशको झनै गरिब म
सिरानबारीमा दुईमाना कोदो छरेर
डलर र पाउण्डमा रमाउने कल्पना गर्दैछु म ।।
सयर गर्छन् कोही यहाँ उबरहरुमा
पौडन्छन् कोही पानी भित्रभित्रै ट्रेनट्युवहरुमा
वारपार गरिरहन्छन्
दुइतले बसहरुका नाङ्गा छानो
क्यानडा बाटरको उमङ्ग न्यानो
कसले कसलाई सोध्ने बुझ्ने फुर्सद छ र
कहाँ हुन्छ र प्रेम यहाँ, फूल र भमराको मिलन झैँ
छताछुल्ल अंग, बस्त्र भंग कसलाई हेर्ने चासो छ र !
संसारभरीका मान्छेहरुको भीडमा
सानो देशको झन सानो मान्छे
गरिब देशको अझ गरिब म ।
लण्डन टावरब्रीजमा उभिएर संसार हेर्दैछु म ।।
यघ्रब्यघ्र छन् पानीजहाज र जलरेलहरु
मान्छेहरुको भीडमा समुद्र पो डुबिरहेझैँ
विद्यार्थीदेखि भद्रभलादमीहरुको चलिरहेछ भीड
यौनाङ्ग देखाउनैका लागि आउँछन् कतिजना
सर्वनङ्ग नै भएपनि कसले हेरिदिने
बेलायती छाउरीहरु भन्दा कहाँ फरक छन् र !
सेताकाला सिंगो तिघ्रा देखाएर
वक्षस्थल पुरै उघारेर क्लिक्क्लिक् फोटो खिच्नेहरु
लुकेर झुकेर हेर्ने नै फुर्सद कसलाई छ र !
सानो देशको सानो मानिस
गरिब देशको झनै गरिब म
प्रेमिल सपनाहरु बोकेर
सुन्दरीहरुको नाङ्गा वदनहरुमा हराइरहेछु म ।।
जापानदेखि अमेरिकासम्म, सिंगापुरदेखि ब्राजिलसम्म
पेरिसदेखि मेलबर्नसम्म, अफ्रिकादेखि ओस्लोसम्म
सौन्दर्यका बासनाहरु छर्दै
अनेकन् रंग र ढंगका अंगअंगहरु फिजाँउदै
कोही अनुभवको खोजीमा,
कोही धन उडाउने हतारोमा
चरीझैं उडिरहेछन् बादलमाथि अनन्त
विश्वसुन्दरीको ताजजस्तो लण्डन टावरले
मलाई खिज्याइरहेछ, जिस्क्याइरहेछ ।
सानो देशको सानो मानिस
गरिब देशको झनै गरिब म
चम्किला सिसाभित्र थुनिएर
सारा नेपालीको यस्तै आलोक खोजिरहेछु म ।।
शरीर गह्रुँगो हुन्छ आफैलाई हेर्दा
भाउन्न चल्छ मेरा शासकहरुलाई देख्दा
अरुलाई मन्तरेर चोख्याउँदै हिड्नेहरुले
अपवित्र पारेको मेरो देश सम्झँदा
इच्छाहरु दबाएर छटपटिन्छु म
अनि ती खुशी मान्छेहरुको भीडमा
हीन भएर, सुख्खा अधरहरुमा मुक्स्कान लुकाएर
लाग्छ– निर्जिव पुत्लासरी भएको छु म ।
यस्तो छ संसार, त्यस्तो छ मेरो देश
उस्तै बनाउने झिनो अभिलाषाको
मैनवती बाल्न खोजिरहेछु म ।
सानो देशको सानो मानिस
गरिब देशको झनै गरिब म
आफ्नै माटोमा फूलफुल्छ की भनेर
लुमण्डहरुको देश फर्किरहेछु म ।।
Read More From Offline Thinker:
Follow Offline Thinker on Facebook, Twitter, and Instagram. You can send us your writings at connect.offlinethinker@gmail.com
