ए झरी

रोकिदेऊ न एकफेरी

तिमीसँग गहिरा कुरा गर्नुछ

आधा मेरो जिन्दगीको

अनि बाँकी तिम्रो अस्तित्वको

केहिबेर रोकिएर आउन सक्छौ?

तिम्रा पानीका एकएक थोपाहरुले

बिझाईरहेको छ मलाई

झस्काइरहेको छ मलाई कि

कतै म यिनै फोकाहरु जस्तै फुटेर त जाँदिन

कतै मेरो अस्तित्व पनि तिम्रै जस्तो

यसरी नै माटोमा नै त हराउँदैन ?

ए झरी,भनिदेऊ न मलाई

कसरी खुशी छौ तिमी यो सँग पनि?

तिम्रो अस्तित्व तिमी खसेको एकएक

थोपाहरुसँगै मेटिँदै गईरहेको छ

तैपनि दर्केर परिरहेछौ

के तिमी रुँदै छौ हो ?

यी पानीका एक एक थोपा

तिम्रा आँशु त होइनन्?

लाग्दैछ कसैले तिम्रो भावनामाथि खेलवाड गर्दैछ

यो माटोबाट आईरहेको गन्ध

कतै तिम्रो रोदनको गन्ध त होइन?

तिमी गर्जिरहेछौ

कतै त्यो गर्जाई

तिम्रो क्रन्दनको आवाज त होइन?

ए झरी रोकिदेऊ न एकफेरी

तिमीसँग गहिरा कुरा गर्नुछ ।।

झरी | कविता | Sandesh Dhakal | काव्यकुञ्ज कविता प्रतियोगिता

YOU MAY ALSO LIKE