By चुस्की
*****
मैले सिकेको पहिलो शब्द,
मैले देखेको पहिलो तस्विर
मैले लगाएको पहिलो माया
र मेरो नजरमा सजिएको पहिलो प्रतिबिम्ब
यो कफीको पहिलो चुस्की झै मीठो हुँदो रैछ।
यो जीवनको भोगाइ एक कप कफी रैछ
जसको सुरुवात पहिलो चुस्कीबाट
र अन्त्य अन्तिम चुस्कीबाट हुँदो रैछ
यो समयको चक्र कफीको तातोपन रैछ
जब समय छ त कफी पनि तातो
र समय ढल्किदै जाँदा कफी सेलाउने रैछ।
यो जीवन चक्रमा प्रेम त कप रैछ
कुनै रङ्गिएको त कुनै सादा
कुनै ठूलो त कुनै सानो
कुनै बलियो त कुनै कमजोर
तर टिकावट कप र पिउने व्यक्तिको समझदारीमा हुँदो रैछ।
जीवनका उतारचढाव कपबाट छुट्टीएका भागहरु रैछन्
कपको समाउने भाग छुट्टिए पनि
त्यहाँ कफी भइन्जेल जीवन त चलिरहन्छ
र जीवनका संघर्षहरु समाउने भाग नभएको कपमा कफी पिउनुरैछ।
यदि चुस्कीमा मिठाससङ्गै तितोपन आउँदैन
सम्झनुस् त्यो कफी कफी होइन
यदि यो जुनीमा सुख र दुःख भोगिदैन
सम्झनुस् त्यो जीवन जीवन होइन
यो जीवनमा फेर्ने अन्तिम सास त
कपमा भाको कफीको अन्तिम चुस्की रैछ
जीवन विनाको शरीर त
कफी विनाको कपझै रित्तो रैछ
साँच्चै यो जीवन त कप र कफी रैछ
जसको सुरुवात पहिलो चुस्कीबाट
र अन्त्य अन्तिम चुस्कीबाट हुदो रैछ।
आकाशका अन्य प्रकाशित कविता पढ्नुहोस्ः
फरक यत्ति छ तिमी र म मा | कविता | Akash Suyal [Offline Thinker]
Get in touch with us for more Articles and Writings. We regularly post on our Facebook, Twitter, and Instagram.
2 Comments